“Unmöglich”-Krakeelers

Wenn maal jichenswo ‘n Straat dichtmookt warrn schall, denn schimpt veele Lüüd: “Dat geiht doch nich!” Man wenn in düsse Straat jichenswat nich anners to moken is, denn wiest sik mehrstendeels, dat geiht eben doch. Wat Minschen sik nich vörstellen köönt (or nich vörstellen wüllt), un wat jem Maleschen mookt, dat funkscheneert, wenn’t nu maal nich anners geiht. “Wat mutt, dat mutt”, dat seggt wi op Plattdüütsch doorto. Wat gifft dat för düssen Tosamenhang för Bispillen, seggt de Oole. Jümmers woller in de Minschengeschicht hebbt de Lüüd bi groote un lütte Saken diskereert un schimpt un wahrschoot, dat jichenswat nich henhauen kann, un achterna wiest sik: Dat funkscheneert heel goot. Mennigmaal funkscheneert dat sogaar beter as vörher.

Een schöön Bispill doorför sünd uuse “Fußgängerzonen”. Wat fröher Straten för Autos weern, dat blifft nu free för Minschen tofoot un oftins ook mit Rad. De Öllern hebbt de Bölkeree seker noch in’n Kopp: Sowat is dat Enn för de Geschäftslüüd, wenn nüms mehr mit sien Auto direktemang vör de Ladendöör parken kann.

Wat hebbt veele Lüüd schimpt över düsse Döösköpp, de keen Autos mehr vör de Geschäften hebben wullen! Wat hebbt se lacht över de Dröömbüxen, de mehr Platz för Minschen midden in de Stadt hebben wullen! Haha! Sitt denn woll in de Autos keene Minschen nich? Wat schall düsse Mumpitz mit Fußgängerzonen?

Un wat weet wi nu? To veele Autos midden in de Stadt mookt de Stadt toschannen. Desterwegen hebbt de “Döösköpp” un “Dröömbüxen” mit ehr Fußgängerzonen uuse schöönen Städten op den richtigen Padd bröcht. Un för de goode Luft is sowat ook noch beter. Hett dat maal een vun de “Unmöglich”-Krakeelers togeben? Mehrstendeels nich. Se hebbt sik liesen na de Siet weg sleken un hebbt sik annere Saken för ehr “Unmöglich”-Bölken söcht.

Denn is door to’n Bispill de Minnstlohn, de nix as Elend bringen schull un de worraftig nix as Vördeelen bröcht hett. Dat gifft de alternativen Energien, de dat nie nich tostannen kriegen kunnen, dat noog Stroom ut uuse Steckdosen kummt. Un wat is passeert? Stroom ut Sünn un Wind hebbt uus all langen vörmookt, wo goot dat funkscheneeren kann. UUn nu lees de Oole annerletz in sien Daagblatt de Överschrift “Bis 2030 sind Städte praktisch autofrei”. Denn stünn door wat vun “Mobilitätswende” un “Fahrradautobahnen” un “dass der Umsatz deutlich steigt, wenn mehr fußläufig oder mit dem Rad eingekauft werden kann”. Ik höör all woller de “Unmöglich”-Krakeelers, grient de Oole.

Detlef Kolze

Du möchtest unsere Inhalte mit anderen teilen? Kein Problem:

Themenvorschläge an die Redaktion

Wir interessieren uns für das, was Sie bewegt! Sie möchten uns eine Information mitteilen, einen Missstand melden oder haben eine Geschichte zu erzählen? Bitte nutzen Sie jederzeit unsere Meldebox und wir kümmern uns.